চেন্নাই: বিনিয়োগকাৰীক আকৰ্ষণ কৰাৰ উদ্দেশ্যে লণ্ডন ভ্ৰমণলৈ যোৱাৰ পূৰ্বে চেন্নাই বিমানবন্দৰত এক বিশেষ পৰিস্থিতিৰ সৃষ্টি হয়। নিজৰ উপদেষ্টাক ভিআইপি গে'টেৰে প্ৰৱেশ কৰিবলৈ অনুমতি নিদিয়াৰ বাবে মুখ্যমন্ত্ৰী চি. জোচেফ বিজয়ে ভিআইপি সুবিধা ত্যাগ কৰি সাধাৰণ যাত্ৰীৰ দৰেই বিমানবন্দৰত প্ৰৱেশ কৰাৰ সিদ্ধান্ত লয়।
প্ৰাপ্ত তথ্য অনুসৰি, মুখ্যমন্ত্ৰী বিজয়ে তেওঁৰ প্ৰথমটো বিদেশ ভ্ৰমণৰ অংশ হিচাপে লণ্ডনলৈ যাবলৈ চেন্নাই বিমানবন্দৰৰ ৬ নম্বৰ ভিআইপি গে'টেৰে প্ৰৱেশ কৰাৰ কথা আছিল। ভ্ৰমণত তেওঁৰ সৈতে সহযোগী হিচাপে থকা মুখ্যমন্ত্ৰীৰ উপদেষ্টা বিষ্ণু ৰেড্ডীকো লগত নিবলৈ মুখ্যমন্ত্ৰীৰ কাৰ্যালয়ে বিশেষ প্ৰৱেশৰ আবেদন জনাইছিল।
কিন্তু অসামৰিক বিমান পৰিবহণ সুৰক্ষা ব্যুৰোৱে (BCAS) সুৰক্ষাজনিত নিয়মৰ দোহাই দি বিষ্ণু ৰেড্ডীক ভিআইপি গে'টেৰে প্ৰৱেশৰ অনুমতি নাকচ কৰে। বিমান বন্দৰ কৰ্তৃপক্ষৰ মতে, কেৱল ৰাষ্ট্ৰপতি আৰু প্ৰধানমন্ত্ৰীৰ বাবেহে নিয়মীয়া আনুষ্ঠানিক প্ৰৱেশৰ ব্যৱস্থা থাকে। বিশেষ অনুৰোধৰ ভিত্তিত ৰাজ্যৰ মুখ্যমন্ত্ৰী আৰু ৰাজ্যপালক এই ৰেহাই দিয়া হয় যদিও তেওঁলোকৰ সৈতে অহা সহযোগী বিষয়াসকলে নিয়ম অনুসৰি সাধাৰণ টাৰ্মিনেল ব্যৱহাৰ কৰিব লাগে।
বিচিএছে মুখ্যমন্ত্ৰীৰ বাবে অনুমতি দিলেও উপদেষ্টাগৰাকীক অনুমতি নিদিয়াত মুখ্যমন্ত্ৰীয়ে অকলশৰে ভিআইপি গে'ট ব্যৱহাৰ কৰিবলৈ অস্বীকাৰ কৰে। নিজৰ সহযোগীৰ সমৰ্থনত তেওঁ সাধাৰণ আন্তঃৰাষ্ট্ৰীয় যাত্ৰীৰ দৰেই টি-২ (T2) টাৰ্মিনেল হৈ যোৱাৰ সিদ্ধান্ত লয়।
মুখ্যমন্ত্ৰীৰ এই সিদ্ধান্তৰ পাছতে বিমানবন্দৰত ভিৰ আৰু বিশৃংখলতা ৰোধ কৰিবলৈ কৰ্তৃপক্ষই জৰুৰীকালীন অৱস্থাত ব্যৱহাৰ হোৱা ‘ডি-৯’ (D9) গে'টেৰে তেওঁলোকক প্ৰৱেশ কৰোৱাৰ বিকল্প ব্যৱস্থা কৰে। যাত্ৰী আৰু অনুৰাগীৰ ভিৰ নিয়ন্ত্ৰণৰ বাবে বিমানবন্দৰ চৌহদত বৃহৎ সংখ্যক আৰক্ষী বাহিনী মোতায়েন কৰা হয়।
Comments
Post a Comment