উত্তৰ-পূবত ৰিলায়েন্সৰ ₹৭৫,০০০ কোটি টকা বিনিয়োগ কৰিবলৈ খণ্ডসমূহৰ মাজত বৃহৎ সম্প্ৰসাৰণৰ ঘোষণা মুকেশ আম্বানীৰ

 গুৱাহাটী, ২৩ মে’: ৰাইজিং নৰ্থ ইষ্ট ইনভেষ্টৰ্ছ ছামিটত এক গুৰুত্বপূৰ্ণ ঘোষণাত ৰিলায়েন্স ইণ্ডাষ্ট্ৰীজ লিমিটেড (আৰ আই এল)ৰ অধ্যক্ষ তথা পৰিচালন সঞ্চালক মুকেশ আম্বানীয়ে ভাৰতৰ উত্তৰ-পূব অঞ্চলত অহা পাঁচ বছৰত বৃহৎ পৰিমাণৰ ৭৫ হাজাৰ কোটি টকা বিনিয়োগ কৰাৰ পৰিকল্পনা উন্মোচন কৰে। এই উল্লেখযোগ্য বিনিয়োগ জৈৱ গেছ উৎপাদন, দূৰসংযোগ, খুচুৰা, স্বচ্ছ শক্তি, স্বাস্থ্যসেৱা, আৰু ক্ৰীড়া উন্নয়নৰ ক্ষেত্ৰত বিস্তৃত হ’ব।

উত্তৰ-পূৰ্বাঞ্চলৰ আঠখন ৰাজ্য—অৰুণাচল প্ৰদেশ, অসম, মণিপুৰ, মেঘালয়, মিজোৰাম, নাগালেণ্ড, ছিকিম, আৰু ত্ৰিপুৰাৰ মুখ্যমন্ত্ৰীসকলক সামৰি লোৱা এখন সভাত ভাষণ দি আম্বানীয়ে অঞ্চলটোৰ অৰ্থনৈতিক বিকাশ, আন্তঃগাঁথনি, আৰু কৰ্মসংস্থাপন বৃদ্ধিৰ বাবে এক অভিলাষী ৰোডমেপৰ ৰূপৰেখা দাঙি ধৰে।

ৰিলায়েন্সে নিজৰ সেউজ শক্তিৰ পদক্ষেপৰ অংশ হিচাপে সমগ্ৰ অঞ্চলটোত ৩৫০টা বায়’গেছ প্লাণ্ট স্থাপন কৰাৰ পৰিকল্পনা কৰিছে। ইয়াৰ উপৰিও এই সংঘবদ্ধ সংস্থাটোৱে ২৫ লাখতকৈ অধিক প্ৰত্যক্ষ আৰু পৰোক্ষ নিয়োগৰ সুযোগ সৃষ্টি কৰাৰ লক্ষ্য ৰাখিছে, যাৰ ফলত অঞ্চলটোৰ ৪.৫ কোটি বাসিন্দাৰ জীৱনত প্ৰভাৱ পৰিব।

আম্বানীয়ে কয়, ‘বিগত ৪০ বছৰত উত্তৰ-পূবত ৰিলায়েন্সে প্ৰায় ৩০ হাজাৰ কোটি টকা বিনিয়োগ কৰিছে।এতিয়া আমি মাত্ৰ অহা পাঁচ বছৰত ৭৫ হাজাৰ কোটি টকাৰ লক্ষ্যৰে সেইটো দুগুণতকৈও অধিক বৃদ্ধি কৰিছো।

গোটটোৰ টেলিকম শাখা ৰিলায়েন্স জিঅ’ই ইতিমধ্যে অঞ্চলটোৰ ৯০% জনসংখ্যালৈ ৫জি সেৱা আগবঢ়াইছে, য’ত ৫০ লাখতকৈ অধিক গ্ৰাহক আছে। বছৰৰ শেষৰ ফালে এই সংখ্যা দুগুণ কৰাৰ প্ৰতিশ্ৰুতি দিছিল আম্বানীয়ে। জিঅ’ৰ অভিযানৰ ভিতৰত আছে বিদ্যালয়, চিকিৎসালয়, উদ্যোগ, আৰু ঘৰলৈ কৃত্ৰিম বুদ্ধিমত্তা (এআই) অনা, যাতে ডিজিটেল বিপ্লৱে উত্তৰ-পূবৰ প্ৰতিটো চুকত উপনীত হয়।

তেওঁ লগতে কয়, ‘যেতিয়া প্ৰতিভাই প্ৰযুক্তি আৰু দক্ষতাই সংযোগক লগ পাব, তেতিয়া আমাৰ উত্তৰ-পূবে আগবাঢ়ি যাব।

ৰিলায়েন্স ৰিটেলে স্থানীয় কৃষকসকলক প্ৰত্যক্ষভাৱে সহায় কৰি তেওঁলোকৰ আয় বৃদ্ধি কৰি ষ্টেপল, ফল-মূল, আৰু শাক-পাচলিৰ ক্ৰয় সম্প্ৰসাৰণ কৰিব। স্বাস্থ্যসেৱা খণ্ডত কোম্পানীটোৱে মণিপুৰত ১৫০খন বিছনাযুক্ত কেন্সাৰ চিকিৎসালয় স্থাপন কৰাৰ পৰিকল্পনা কৰিছে, য’ত অঞ্চলটোত জটিল যত্ন আৰু চিকিৎসাৰ সুবিধা প্ৰদান কৰা হ’ব।

অঞ্চলটোৰ চহকী ক্ৰীড়া প্ৰতিভাক স্বীকৃতি দি ৰিলায়েন্স ফাউণ্ডেচনে ৰাজ্য চৰকাৰসমূহৰ সৈতে সহযোগিতা কৰি আঠখন ৰাজ্যতে অলিম্পিক প্ৰশিক্ষণ কেন্দ্ৰ স্থাপন কৰিব। এই কেন্দ্ৰসমূহৰ লক্ষ্য হৈছে পৰৱৰ্তী প্ৰজন্মৰ খেলুৱৈসকলক বিশ্বৰ মঞ্চত প্ৰতিযোগিতাত অংশগ্ৰহণ কৰিবলৈ প্ৰস্তুত কৰা।

উত্তৰ-পূবক ঐতিহাসিকভাৱে অৱহেলিত অঞ্চলৰ পৰা উন্নয়নৰ গতিশীল কেন্দ্ৰলৈ ৰূপান্তৰিত কৰাৰ বাবে প্ৰধানমন্ত্ৰী নৰেন্দ্ৰ মোডীক প্ৰশংসা কৰে আম্বানীয়ে। ‘আপুনি উত্তৰ-পূবক পৰিসীমাৰ পৰা ভাৰতৰ উন্নয়নমূলক মানচিত্ৰৰ কেন্দ্ৰলৈ লৈ আহিছে।’

তেওঁ ৰিলায়েন্সৰ সৰ্বাংগীন বৃদ্ধিৰ প্ৰতি দায়বদ্ধতাক দৃঢ়তাৰে কয় যে, “আপোনালোকৰ নিৰ্দেশনাত আমি উদ্যোগত সকলো মুখ্যমন্ত্ৰীৰ সৈতে কাম কৰিম যাতে উত্তৰ-পূবক বিশ্বৰ বাবে এক প্ৰেৰণাদায়ক আৰ্হি হিচাপে গঢ়ি তোলা হয়—প্ৰগতিয়ে কেনেকৈ পৃথিৱী মাতৃক সন্মান কৰিব পাৰে, প্ৰতিটো ঘৰলৈ সমৃদ্ধি কঢ়িয়াই আনিব পাৰে, আৰু উন্নয়নৰ জৰিয়তে জাতিটোক একত্ৰিত কৰিব পাৰে তাক দেখুৱাম।”

এই সাহসী বিনিয়োগে ভাৰতৰ আঞ্চলিক উন্নয়নৰ কাহিনীৰ এক উল্লেখযোগ্য অধ্যায় হিচাপে চিহ্নিত কৰিছে, উত্তৰ-পূবক ৰাষ্ট্ৰীয় আৰু বিশ্ব অৰ্থনৈতিক ৰাডাৰত দৃঢ়ভাৱে স্থান দিছে।